Issiqxonalarda ukrop yetishtirish
Nashr etilgan: 19-02-2026
Иссиқхоналарда укроп етиштириш бўйича тавсиялар
Ёпиқ ерда кўк сабзавотлардан укроп, кашнич, редиска,
петрушка ва селдерей ўстирилади. Булар йилнинг «илик узилди»
пайтида декабрдан февралгача барра маҳсулот бериб жонга ора
киради. Уларнинг иссиққа талабчанлиги нисбатан юқори. Кўк
сабзавотлар униб чиққунча 20-22ºC оптимал ҳарорат зарур. Қуёшли
кунларда максимал ҳарорат юқоридагига нисбатан кўпи билан 4-5ºC
дан ортиқ бўлиши мумкин.
Укроп учун ҳавонинг нисбий намлиги 60-70%, бошқа экинлар
учун 80-85% бўлиши лозим. Ортиқча нам тўпланиши натижасида ва
паст ҳароратда чириш жараёни бошланади. Кўкат экинлар учун
юмшоқ ва азотга бой унумдор тупроқ керак. Барвақт етиладиган
экинлар тупроққа талабчан бўлмайди. Бироқ уларнинг гуркираб
ўсиши учун озиқли суғориш керак.
Қишки иссиқхоналарда укроп, асосан бодринг ва помидорни
зичлаштирувчи экин сифатида экилади.
Шунингдек ёруғ коридорга қўйилган яшикларда, кичик ҳажмли
плёнка остида, баҳорги иссиқхоналарнинг ойна олди майдончасида,
парникларда ҳам зич экин сифатида, баъзан бир ўзи етиштирилади.
Укроп ўстириш учун 10-12 см қалинликда тупроқ бўлиши керак.
Иситилмайдиган плёнкали иссиқхона ҳамда кичик ҳажмли усти
вақтинча ёпилган жойларда укроп кузги оборотда октябр
ўрталаридан ноябр охиригача, эрта кўкламда эса феврал бошидан
мартнинг ўрталаригача етиштирилади.
Уруғлик экиш олдидан 2 сутка давомида сувда ивитиб қўйилади
(ҳар 6-8 соатда сув янгиланади), кейин қуритилади. Қишки
иссиқхоналарда уруғ яшикларга ёппасига сепилади. Бунда бир
яшикка 3-4 грам уруғ сарфланади, узунлиги ва кенглиги 1 м2 ерга 20-
30 грам уруғ кетади. Зич экин сифатида экилганда 4-6 қаторли лента
усулида 1 м2 ерга 10-15 грам уруғ сарфланади.
Парникда мустақил экин сифатида етиштирилганда бир рама
остига 40-50 грам уруғ сочилади. Укроп зич экин сифатида
етиштирилганда 30 см ли 2 қаторли лента усулида рама четларига
сепилади. Бунда ҳар бир рамага 15 грамгача уруғ сарфланади.
Экилган заҳоти шланга ёки гулчелакда илиқ сув берилади. Сўнг
устига 0,5 см қалинликда майин чиринди сепиб, бироз зичлаб
қўйилади. Кўчат яшикларини уруғ сепилгандан сўнг 3-5 кун давомида
20-25ºC ҳароратли жойда бир-бирини устига қўйиб сақлаш мумкин.
Майсалар пайдо бўлиши билан яшиклар ёруғ жойга қатор қилиб
қўйилади.
Укроп парвариши, асосан зарур ҳарорат ва намликни сақлаш,
ўсув даври давомида азотли ўғит (1 литр сувга 3-4 грам аммонийли
селитра) бериш билан алмашланган ҳолда 2-3 марта суғоришдан
иборат.
Укроп барра пайтида ўриб олинаверади. Кузги-қишки муддатда
майсаси кўрингач 40-45 кунда истеъмол учун тайёр бўлади.
Қишдагига нисбатан баҳорда етиштирилган укроп кўпроқ ҳосил
беради.
